حرب الإتصالات في الكويت

Viva
Originally uploaded by Q8LT.net

بدت خدمة الهواتف النقالة في الكويت من خلال شركة أم تي سي في الثمانينات (تعرف حالياً بإسم زين)، و كان وقتها سعر الدقيقة الواحدة كبير.

ظلت شركة أم تي سي متسيدة الساحة لغاية أواخر التسعينات لما زهرت شركة الوطنية للإتصالات في الكويت و صار في تنافس في البداية و تخفيض في أسعار المكالمات و ظهرت خدمات جديدة ما ظهرت من قبل.

في 2008 ظهرت ثالث شركة إتصالات تحت اسم
VIVA
و حالياً اعلانتها في كل مكان في شوارع الكويت...في اول بدايتها من اسبوع تقريباً اعلنت إن إستلام المكالمات الواردة مجاني سواء كانت مستلمة من هاتف ارضي او من مكالمات دولية...و لحقتها على طول شركة زين (أم تي سي سابقاً) و بعدها الوطنية في هالموضوع...حتى وصلني مسج من الوطنية يومها ضحكني يقول:

"بفخر تنضم الوطنية لتواكب عصراً جديداً في إستقبال المكالمات الواردة مجاناً"...يعني اللي يسمعهم الحين ما يقول سوو جذيه غصباً عليهم لووول

و قبل جم يوم أعلنت شركة فيفا إن سعر الدقيقة في الذروة راح يكون 30 فلس مع العلم إن سعر الذروة في زين و الوطنية 39 فلس...إلا إذا كان عندكم خدمة وزارات تصير الدقيقة 23 أو 24 فلس.

المهم...اليوم كنت قاعد اقرا الجريدة و طحت على خبر في جريدة الدار الكويتية يقول إن وزير المواصلات راح يجتمع في الشركات الثلاث عشان يناقشون موضوع المنافسة اللي صاير.

طبعاً المكالمات في الكويت تعتبر من أغلى المكالمات في العالم إذا ما كانت اغلاهم...حتى في الإمارات اللي ما عندهم غير شركة إتصالات وحدة محتكرة السوق سعر الدقيقة عندهم أقل من الكويت...يعني يا سعادة الوزير انت مو شايف ان الوطنية و زين قاعدين يبوقون الشعب؟

هذا خبر الدار للي يحب يقرا:
http://www.aldaronline.com/AlDar/AlDarPortal/UI/Article.aspx?ArticleID=24798

الصورة اللي فوق، تصوير صالح الغيث